मंगलवार, भाद्र १६ गते २०८३
मंगलवार, भाद्र १६ गते २०८३
सोमवार , भाद्र १५, २०८३
गोरखा, भदौ ।
उत्तरी गोरखाको छेकम्पारस्थित चौरीखर्कमा सोमबार बिहान करिब १० बजेतिर ठूलो पहिरो खसेको छ । चुमनुब्री- ७ स्थित बूढीगण्डकी नदीको सहायक खोला स्यारखोलामा ठूला ढुंगा र जंगलका रुखहरुसहित पहिरो खसेको वडाअध्यक्ष टासी दोर्जे लामाले जानकारी दिए ।
करिब तीनसय मिटर माथिदेखि स्यारखोलासम्म पहिरो खसेको उनले बताए । पहिरोले केहीबेर खोला थुनिए पनि पछि खुल्ला भएको उनले बताए । अहिले सो पहिरोका कारण कुनै जोखिम नरहेको जिल्ला प्रशासन कार्यालयले जनाएको छ ।
निरन्तर पानी परिरहेको र पहिरो जाने क्रम पनि नरोकिएकाले सो खोला र बूढीगण्डकी किनारमा बसोबास गर्ने स्थानीयबासी सचेत रहनुपर्ने सहायक प्रमुख जिल्ला अधिकारी नेत्रप्रसाद शर्माले जानकारी दिए ।
‘माथिबाट झरेको पहिरो सबै खोलामा झरिसकेको छैन । ठूलो भाग पहिरो बीचमा अड्किएर बसेको छ । बिस्तारै बिस्तारै खस्दै पनि छ ।
त्यसैले यो पहिरो झरेर खोला थुन्यो भने यसभन्दा तलका बस्तीहरु जोखिम हुनसक्छ’,सप्रजिअ पौडेलले भने,‘त्यसैले अहिलेका लागि पहिरो टरे पनि स्यार खोला र बूढीगण्डकी किनारका बस्तीका बासिन्दा सचेत हुनु अनिवार्य छ ।’
पहिरो सबै खोलामा नझरिसकेकाले जोखिम कायमै रहेको पहिरोको अवलोकन गरेर फर्केका मनास्लु संरक्षण क्षेत्र आयोजनाका कर्मचारी सुवास नेपालले बताए । ‘पहिरोले खोलामा झारेका ठूला–ठूला रुख खोलाको वारिपारि तेस्र्याएर राखेको छ ।
ठूला–ठूला ढुंगा पनि खोलामा खसालेको छ’, उनले भने, ‘ठूलो पानी पनि परिरहेको छ । त्यसैले ढुक्क भएर बस्ने अवस्था छैन ।’समुद्री सतहबाट करिब तीनहजार मिटर अग्लो ठाउँबाट करिब २७०० मिटर उचाइसम्म पहिरो झरेको उनले बताए ।
सो खोला थुनिएर ठूलो बाढी आएमा रेन्जमको बस्ती, घट्टेखोला, सिर्दिबास, सल्लेरी, जगत लगायतका गाउँबस्ती जोखिममा पर्न सक्ने वडाअध्यक्ष टासी दोर्जे लामाको भनाइ छ ।
