बिहिवार, कार्तिक २० गते २०८३
बिहिवार, कार्तिक २० गते २०८३
सोमवार , बैशाख २०, २०७८
काठमाडौं, वैशाख । नेपालमा कोरोना भाइरसका सात हजार ३८८ सङ्क्रमित थपिएका छन् । स्वास्थ्य तथा जनसङ्ख्या मन्त्रालयले पछिल्लो चौबीस घण्टामा १६ हजार ६५८ को आरटीपीसीआर परीक्षण गरिएकोमा सात हजार ३८८ मा सङ्क्रमणको पुष्टि भएको जनाएको छ ।
स्वास्थ्य तथा जनसङ्ख्या मन्त्रालयले कोभिड १९ सम्बन्धी दैनिक विवरण अद्यावधिक गर्दै थपिएका सङ्क्रमितसँगै नेपालमा कोरोनाका कुल सङ्क्रमित तीन लाख ४३ हजार ४१८ पुगेको जनाएको छ ।
पछिल्लो चौबीस घण्टामा ५१८ को एन्टीजेन परीक्षण गरिएकोमा ६० को रिपोर्ट पोजेटिभ देखिएको छ । मन्त्रालयले पछिल्लो चौबीस घण्टामा दुई हजार २१ सङ्क्रमित कोरोनामुक्त भएको उल्लेख गरेको छ ।
हालसम्म दुई लाख ८६ हजार १५ कोरोनामुक्त भएका छन् । सङ्क्रमित सङ्ख्या बृद्धि हुनु र निको हुने कम हुँदा सङ्क्रमित निको हुने दर घटेर ८३.३ प्रतिशत भएको छ । हाल ५४ हजार ४१ मा भाइरसको सङ्क्रमण सक्रिय छ ।
मन्त्रालयले पछिल्लो चौबीस घण्टामा ३७ सङ्क्रमितको मृत्युको पुष्टि भएको उल्लेख गरेको छ । यो सङ्ख्या चौबीस घण्टामा पुष्टि भएका मृतकको अहिलेसम्मकै सबैभन्दा बढी हो । हालसम्म कोरोना सङ्क्रमणबाट तीन हजार ३६२ को मृत्यु भएको छ ।
हाल २१२ क्वारेन्टिनमा र ५४ हजार ४१ आइसोलेशनमा रहेको मन्त्रालयले जनाएको छ । हालसम्म २५ लाख २१ ह्जार १६४ को आरटीपीसीआर परीक्षण गरिएको छ ।
