शुक्रवार, कार्तिक २१ गते २०८३
शुक्रवार, कार्तिक २१ गते २०८३
संक्रमित भेटिएकामध्ये २९४ पुरुष र २० जना महिला
सोमवार , जेठ २६, २०७७
काठमाडौं, जेठ । सोमबार थप ३१४ जनामा कोरोना भाइरस (कोभिड–१९) संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार सोमबार संक्रमित भेटिएकामध्ये २९४ जना पुरुष र २० जना महिला छन् ।
यससँगै नेपालमा कोरोना संक्रमितको संख्या ३ हजार ७६२ पुगेको छ । उनीहरूमध्ये १४ जनाको मृत्यु भएको छ भने ४८८ जना डिस्चार्ज भएका छन् ।
मोरङमा ९ जनामा संक्रमण पुष्टि भएको छ । धनपालथान गाउँपालिकामा पाँच जनामा तथा लेटाङ र रतुवामाई नगरपालिकामा दुई÷दुई जनामा कोरोना संक्रमण पुष्टि भएको हो ।
झापा गौरीगञ्ज गाउँपालिका ६ जना र सुनसरीको कोसी गाउँपालिकाका १९ वर्षीय पुरुषको रिपोर्ट पोजेटिभ आएको छ । यस्तै, हल्दीबारी क्वारेटिनमा रहेका झापाका तीन जना र पाँचथर लालीखर्चका २३ वर्षीय पुरुषमा पनि संक्रमण पुष्टि भएको छ ।
सर्लाहीमा १२० जना संक्रमित थपिए
पछिल्लो २४ घण्टामा प्रदेश–२ मा ७ जना महिला सहित एक सय ७४ जनामा कोरोना संक्रमणको पुष्टि भएको छ । थपिएका संक्रमितमध्ये सर्लाहीका १२० जना छन् ।
सर्लाहीको बिष्णु गाउँपालिकाका ३५ जना, ब्रम्हपुरी गाउँपालिकाका ४३ जना, चकरघट्टा गाउँपालिकाका १५ जना, बलरा नगरपालिकाका ८ जना र ईश्वरपुर नगरपालिकाका १८ जनामा संक्रमण पुष्टि भएको छ । यस्तै, रामनगर गाउँपालिकास्थित क्वारेन्टिनमा रहेका ३७ वर्षीय पुरुषमा कोरोना संक्रमण देखिएको छ ।
यस्तै, सप्तरीमा १६ जना, महोत्तरीमा १२ जना, रौतहटमा ११ र पर्सामा ८ जनामा कोरोना संक्रमण पुष्टि भएको हो । बारामा ७ जना संक्रमित थपिएका छन्, जसमा आमासँगै तीन वर्षीया बालिका पनि छिन् ।
चितवनमा १७ जनाको रिपोर्ट पोजेटिभ
चितवनमा दुई चिकित्सकसहित २३ जनामा कोरोना भाइरसको संक्रमण पुष्टि भएको छ । भरतपुरस्थित कोरोना परीक्षण प्रयोगशालामा गरिएका परीक्षणमा चितवनका १७ जना, नवलपरासी पूर्वका पाँच जना र धादिङका एक जनाको रिपोर्ट पोजेटिभ आएको छ ।
यस्तै, स्याङ्जाका ६० वर्षीय पुरुष र पोखराका ४२ वर्षीय पुरुषमा पनि संक्रमण पुष्टि भएको छ ।
मृतकको सम्पर्कमा आएका ३० जना संक्रमित
अर्घाखाँचीमा ३१ जना संक्रमित थपिएका छन् । उनीहरूमध्ये ३० जना कोरोना भाइरसको संक्रमणबाट मत्यु भएका अर्घाखाँचीको भूमिकास्थान नगरपालिका वडा नम्बर–९ चरेपानीका युवकको सम्पर्कमा आएकाहरू हुन् । उनको भारतबाट मजदुरी गरी फर्कने क्रममा जेठ १० गते बाटोमै मृत्यु भएको थियो ।
यस्तै, कपिलवस्तुका २४ जनाको रिपोर्ट पोजेटिभ आएको छ । उनीहरूमध्ये सात जना महाराजगञ्जका छन् । बर्दियाका १८ जना, रुपन्देहीका ५ जना, दाङका ४ जना, बाँकेका एक जना र नवलपरासीका दुई जनामा कोरोना संक्रमण पुष्टि भएको छ ।
लुम्बिनी मेडिकल कलेजमा उपचाररत गुल्मीकी ३२ वर्षीया महिला र पाल्पाका एक पुरुषमा पनि कोरोना संक्रमण पुष्टि भएको स्वास्थ्य मन्त्रालयले जनाएको छ । यस्तै, दैलेखका १० जना, सल्यानका छ जना र सुर्खेतका एकजनामा संक्रमण पुष्टि भएको छ ।
एक लाख कट्यो पीसीआर टेस्ट
स्वास्थ्य मन्त्रालयका अनुसार पछिल्लो २४ घण्टामा चार हजार सात सय ६६ नमुनाको पीसीआर टेस्ट गरिएको थियो । त्यसक्रममा तीन सय १४ जनामा संक्रमण पुष्टि भएको हो । यससँगै अहिलेसम्म पीसीआर टेस्टको संख्या एक लाख ९७१ पुगेको छ ।
यस्तै, पछिल्लो २४ घण्टामा ११ हजार नौ सय ४२ आरडीटी टेस्ट भएको छ । यससँगै कुल टेस्टको संख्या एक लाख ५६ हजार ९९१ पुगेको छ । सातै हाल एक लाख ७० हजार सात सय ३२ जना क्वारेन्टिनमा रहेको मन्त्रालयले जनाएको छ ।
