शनिवार, कार्तिक २२ गते २०८३
शनिवार, कार्तिक २२ गते २०८३
आइतवार , श्रावण ८, २०७९
काठमाडौँ, साउन । संघीय तथा प्रदेश संसद निर्बाचन नजिकिदै जाँदा पूर्वप्रधानमन्त्री एवं नेकपा (एकीकृत समाजवादी) का नेता झलनाथ खनालले वामपन्थी र समाजवादी शक्तिको एउटै मोर्चा बनाएर निर्वाचनमा जानुपर्ने बताएका छन् ।
नयाँ बानेश्वरस्थित संसद् भवनमा आईतबार सञ्चारकर्मीसँग कुरा गर्दै पूर्वप्रधानमन्त्री खनालले भने, देशका वामपन्थी र समाजवादी शक्तिहरूको एउटै मोर्चा बनाएर निर्वाचनमा जाने छलफल भइरहेको छ ।
नेता खनालले यस सम्बन्धमा दुई पटक छलफल भइसकेको र छलफलको क्रम जारी रहेको पनि उल्लेख गरे । उनले देशको आवश्यकता वामपन्थी शक्ति एकै ठाउँमा आउनु भए पनि कतिपपय समूह त्यसका लागि तयार नभएको बताए ।
उनले भने, ‘हामी जम्माजम्मी दुई पटक बसेका छौँ, छलफल जारी छ । देशका वामपन्थी र समाजवादी पार्टी, समूह एकतावद्ध भएर एउटा मोर्चा बनाएर चुनावतिर जाऊँ भन्नेखालका कुरा सोच्दैछौँ । सल्लाह गर्दैछौँ । '
'आवश्यकताको दृष्टिले सबै वामपन्थीहरू एक ठाउँमा आउनु अहिलेको आवश्यकता हो । तर कतिपय समूह तयार नै छैनन् । आउने चुनावमा बिल्कुलै सम्मानजनक ढंगले सबैको बीचमा सहमति हुनुपर्ने आवश्यकता छ ।’
तत्कालीन आवश्यकता पाँच दलीय गठबन्धनको भए पनि दीर्घकालीन आवश्यकता भने वाम एकता रहेको उनको भनाइ थियो । वाम एकताको सम्बन्धमा नेकपा (एमाले) सँग पनि कुराकानी चलेको भए पनि प्रभावकारी नभएको उनको भनाइ छ ।
