शनिवार, कार्तिक २२ गते २०८३
शनिवार, कार्तिक २२ गते २०८३
शुक्रवार , चैत्र ११, २०७८
काठमाडौँ, चैत । नेपाल कम्युनिष्ट पार्टी (एमाले) केन्द्रिय कमिटी बैठकले ११ सदस्यीय स्थानीय तह निर्वाचन घोषणापत्र तयारी समिति गठन गरेको छ । सो बैठकले वरिष्ठ उपाध्यक्ष ईश्वर पोखरेलको संयोजकत्वमा घोषणापत्र तयारी समिति बनाउने निर्णय गरेको नेता शेरबहादुर तामाङले सञ्चारकर्मीलाई जानकारी दिएका छन ।
पोखरेल नेतृत्वको समितिमा युवराज ज्ञवाली, प्रदीप ज्ञवाली, विष्णु रिमाल, देवेन्द्र दाहाल, मनोजजंग थापा, युवराज खतिवडा, प्रभा बराल, दिनेशचन्द्र देवकोटा र सुशील ज्ञवाली छन् ।
बैठकले एमाले अध्यक्ष केपी शर्मा ओलीको राजनीतिक प्रतिवेदनसहित कार्यसूचीमा रहेका सबै विषय पारित गर्नुका साथै चैत मसान्तभित्र ६ मापदण्ड अनुसार स्थानीय तहका उम्मेदवार सिफारिस गर्न निर्देशन दिएको छ ।
चुनावी तालमेलको अधिकार स्थानीय तहलाई नै दिने तर केन्द्रबाट तालमेल नगर्ने निर्णयसमेत बैठकले गरेको छ । स्थानीय तह निर्वाचन वैशाख ३० गतेका लागि तय भएको छ । तामाङका अनुसार स्थानीय तह निर्वाचन घोषणापत्र २०७९ वैशाख ९ मा केन्द्रीय तहबाट जारी गर्ने र स्थानीयस्तरमा पनि आ–आफ्नो आवश्यकता अनुसार प्रतिबद्धतापत्र जारी गरिनेछ ।
अध्यक्ष केपी शर्मा ओलीले चैत १६ मा ७५३ वटै पालिकाका पार्टी प्रतिनिधिसँग भर्चुअल संवाद गर्ने जानकारी पनि उनले दिए ।
