शनिवार, कार्तिक २२ गते २०८३
शनिवार, कार्तिक २२ गते २०८३
बिहिवार , चैत्र १०, २०७८
दमौली, चैत । विभिन्न कार्यक्रमका अवसरमा तनहुँ पुगेका प्रधानमन्त्री शेरबहादुर देउवाले कार्यकर्ता भेटघाटका क्रममा वर्तमान पाँच दलीय गठबन्धनलाई चुनावसम्म बचाएर लैजानुपर्ने अहिलेको आवश्यकता रहेको बताएका छन् ।
नेपाली कांग्रेस तनहुँले आज पार्टी कार्यालयमा आयोजना गरेको स्वागत कार्यक्रममा बोल्दै प्रधानमन्त्री देउवाले भने, लोकतन्त्र बचाउनका लागि पनि गठबन्धन आवश्यक छ ।
कार्यक्रमका अवसरमा प्रधानमन्त्री देउवाले लोकतन्त्र र प्रजातन्त्र बचाउन गठबन्धनका दलको योगदान रहेको उल्लेख गर्दै भने, “स्थानीय चुनावमा मात्र नभई प्रतिनिधिसभा र प्रदेशसभाको निर्वाचनसम्म नै गठबन्धनलाई लैजानुपर्छ । उनीहरुलाई पनि उचित स्थान दिनुपर्छ ।”
प्रधानमन्त्री देउवाले आगामी वैशाख ३० गते हुने स्थानीय तह निर्वाचनमा पार्टीलाई जिताउन एकढिक्का भएर लाग्न पनि आग्रह गरेका छन । तनहुँ आदिकवि भानुभक्तको जिल्ला भएकाले यसको छुट्टै महत्व रहेको बताउँदै देउवाले भने, कांग्रेसका लागि तनहुँ उर्वरभूमि हो ।
सो अवसरमा वरिष्ठ नेता रामचन्द्र पौडेलले लोकतन्त्रको आन्दोलनमा तनहुँको भूमिका सदैव उच्च रहेको उल्लेख गरे । उनले भने, सबै निर्वाचनमा तनहुँमा कांग्रेसले जित्नुपर्छ ।
