२०८३, मंसिर ३ गते

बुधवार, मंसिर ३ गते २०८३

अमेरिकी राजनीतिमा डेमोक्रेट- रिपब्लिकन टकराव

राष्ट्रपति ट्रम्पले दाबी गर्दै भने : " अझै बलियो भएर फर्किन्छु "

डेमोक्रेटहरूको तयारी -' राष्ट्रपति ट्रम्प र प्रशासनका उच्च अधिकारीहरूमाथि अनुसन्धान अघि बढाउने चेतावनी'

सोमवार , कार्तिक २४, २०८३

 

काठमाडौँ, कात्तिक ।

अमेरिकी मध्यावधि निर्वाचनमा रिपब्लिकन पार्टीले कङ्ग्रेसका दुवै सदनको नियन्त्रण गुमाएपछि अमेरिकी राष्ट्रपति डोनाल्ड ट्रम्पले अझ बलियो भएर फर्किने वाचा गरेका छन्।

निर्वाचन परिणामसँगै डेमोक्रेटहरूले राष्ट्रपति ट्रम्प र उनको प्रशासनका उच्च अधिकारीहरूमाथि अनुसन्धान अघि बढाउने चेतावनी दिएपछि वासिङ्टनको राजनीतिमा व्यापक टकराव सिर्जना भएको छ।

 

कङ्ग्रेसका दुवै सदनका समितिहरूमा नियन्त्रण कायम गर्न लागेका डेमोक्रेटहरूले ट्रम्प परिवारको व्यापार, क्रिप्टोकरेन्सी कारोबार, एलन मस्कसँग सम्बन्धित सरकारी सम्झौता, आप्रवासन नीति तथा इरान युद्ध सञ्चालनलगायतका विषयमा अनुसन्धान अघि बढाउने तयारी गरेका छन्।

संसदीय समितिहरूले प्रशासनका अधिकारीहरूलाई बयानका लागि बोलाउने र सार्वजनिक सुनुवाइ गर्नेसम्मको अधिकार प्रयोग गर्न सक्नेछन्।

ट्रम्पले सामाजिक सञ्जालमार्फत निर्वाचन परिणामलाई देशका लागि ठूलो धक्का भन्दै आफूहरू अझ सशक्त रूपमा फर्कने दाबी गरेका छन्।

उनले अधिकारीहरूलाई महाभियोग लगाउने डेमोक्रेटहरूको चेतावनीलाई दबाब सिर्जना गर्ने प्रयास मात्र भएको टिप्पणी गर्दै न्याय मन्त्रालयलाई यसबारे अनुसन्धान गर्न निर्देशन दिइएको बताएका छन्।

यसैबिच, ट्रम्पले कडा आप्रवासन नीतिका मुख्य योजनाकार स्टीफन मिलरलाई नयाँ ' चिफ अफ स्टाफ' नियुक्त गरेका छन्। यता उपराष्ट्रपति जेडी भान्ससहित केही रिपब्लिकन नेताहरूले भने चुनावमा पार्टीको पराजयका कारणहरूबारे आन्तरिक समीक्षा हुनुपर्नेमा जोड दिएका छन्।

डेमोक्रेटिक नेता हाकिम जेफ्रीजले इरान युद्ध सञ्चालनमा लापरबाही गरेको र राष्ट्रिय सुरक्षा कमजोर बनाएको आरोप लगाउँदै रक्षामन्त्री पीट हेगसेथविरुद्ध महाभियोग प्रस्तावको समर्थन गरेका छन्।

ट्रम्पले भने हेगसेथको बचाउ गर्दै भेनेजुएला र इरानसँगका युद्धमा अमेरिकाले सफलता हासिल गरेको दाबी पुनः दोहोर्याएका छन्। महान्यायाधिवक्ता टोड ब्लान्चेले प्रशासनका अधिकारीमाथि अनुसन्धान वा कारबाहीको प्रयास भए न्याय मन्त्रालयले पूर्ण रूपमा बचाउ गर्ने बताएका छन्।

तर प्रतिनिधिसभाको निगरानी समितिका वरिष्ठ डेमोक्रेटिक सदस्य रोबर्ट गार्सियाले कार्यकारी शाखालाई जवाफदेही बनाउनु कङ्ग्रेसको संवैधानिक जिम्मेवारी भएको बताउँदै भ्रष्टाचार र जनताविरुद्धका अपराधको अनुसन्धानबाट पछि नहट्ने अडान दोहोर्याएका छन्।

प्रतिक्रिया
सम्बन्धित समाचार