आइतवार, आश्विन ४ गते २०८३
आइतवार, आश्विन ४ गते २०८३
शनिवार , माघ १०, २०८२
ब्रसेल्स, माघ । युरोपेली सङ्घ (ईयु) ले ग्रिनल्याण्ड विवादका कारण बढ्दो तनावको बिचमा आकस्मिक सम्मेलन आयोजना गरेको छ । अमेरिकी राष्ट्रपतिले आठ युरोपेली देशमा धम्की दिइएको शुल्क अस्थायी रूपमा रोक्ने घोषणा गरे पनि युरोपले आफ्नो हितको संरक्षणमा सक्रिय भूमिका देखाएको छ ।
अमेरिका र युरोपबिचको तनाव
अमेरिकाले ग्रिनल्याण्डको विषयमा आफ्नो प्रभुत्व कायम राख्ने प्रयास गर्दा युरोपले आफ्नो परम्परागत सहयोगीको मूल्याङ्कन पुनः गर्नुपर्ने अवस्था आएको छ ।
विश्लेषकले यस घटनालाई सहयोगी राष्ट्रमाथि जबरजस्ती नीति असफल हुने उदाहरण भनेका छन् । युरोपेली आयोगकी अध्यक्ष उर्सुला भोन डेर लेयेनले सम्मेलनपछि भने, हाम्रो प्रतिकार प्रभावकारी रह्यो ।
युरोपेली परिषद्का अध्यक्ष एन्टोनियो कोस्टाले भने, ' हामी कुनै पनि प्रकारको दबाबलाई स्वीकार्दैनौ र आफ्ना हितको रक्षा गर्ने छौ ।'
युरोपेली संसदले अमेरिकासँगको व्यापार सम्झौता अस्थायी रूपमा रोक्ने निर्णय पनि गरेको छ । स्वीडेनकी उपप्रधानमन्त्री एब्बा बुशले भने, 'अहिले अमेरिकालाई प्रशंसा गरेर मनाउने तरिका काम गर्दैन ।'
रणनीतिक स्वतन्त्रताको आवश्यकता
विश्लेषकले अमेरिकी प्रभुत्वशाली नीतिले युरोपमा अविश्वास बढाउने र दीर्घकालीन स्वतन्त्रता खोज्नको लागि उत्प्रेरणा दिन सक्ने चेतावनी दिएका छन् । बेल्जियमका प्रधानमन्त्री बर्ट डे वेभरले भने, युरोप अहिले निर्णायक मोडमा छ ।
युरोपेली आयोगकी अध्यक्षले पनि आत्मनिर्भरता र रणनीतिक स्वतन्त्रता निर्माण गर्न यो अवसर आवश्यक भएको औँल्याए । फ्रान्सका राष्ट्रपतिले युरोपलाई सतर्क रहन र नयाँ चुनौतीलाई दृढ रूपमा सामना गर्न तयार रहन सुझाएका छन ।
अमेरिकी प्रभुत्वको प्रभाव
विशेषज्ञले भने, ' प्रभावशाली राष्ट्रको जबरजस्ती नीति छोटो समयका लागि फाइदा दिन सक्छ, तर यसले सहयोगीलाई नयाँ गठबन्धन र आत्मनिर्भरता तर्फ लैजान्छ ।
क्यानाडाका प्रधानमन्त्रीले यसै सम्मेलनमा नयाँ अन्तर्राष्ट्रिय व्यवस्था निर्माणको आवश्यकता औँल्याएका थिए, जसले विश्वव्यापी सहकार्य र समान अधिकार सुनिश्चित गर्ने लक्ष्य राख्छ ।
ग्रिनल्याण्ड विवादले युरोप र अमेरिकाबिचको सम्बन्ध अब पहिले जस्तो भरोसापूर्ण नरहेको देखाएको छ । युरोपले दीर्घकालीन दृष्टिकोणबाट आफ्नो स्वतन्त्रता र रणनीतिक निर्णय क्षमता सुनिश्चित गर्न आवश्यक ठानि रहेको छ । सिन्ह्वा
