काठमाडौँ, पुस । नेपाल–भारत संयुक्त आयोगको सातौं बैठकमा सहभागी हुन भारतका विदेशमन्त्री एस जयशंकर बिहीबारदेखि दुईदिने औपचारिक भ्रमणमा नेपालमा छन । 

बिहीबारकै दिन अको छिमेकी देश चिनियाँ नेतासहितको टोली पनि काठमाडौ आइपुगेको छ । भारतका विदेशमन्त्री एस जयशंकरले आफू आएकै दिन चिनीयाँ पाहुनालाइृ  पनि बोलाएको भन्दै नेपाली पक्षसमक्ष असन्तुष्टि जनाएको विभिन्न स्रोतले जनाएको छ ।  

बिहीबार दिउँसो चिनियाँ कम्युनिस्ट पार्टी (सीपीसी) का युनान प्रान्त डेपुटी सेक्रेटरी सी युगाङ चारदिने भ्रमणका लागि काठमाडौं आएका छन् ।

फेरि रिसाए जयशंकर

कान्तीपुर दैनिक लेख्छ, २०७२ मा नेपालको संविधानसभाले दफा–दफा गर्दै संविधान पारित गरिसकेपछि भारतका तत्कालीन विदेश सचिव जयशंकर प्रधानमन्त्री नरेन्द्र मोदीको विशेष दूतका रूपमा काठमाडौं आएका थिए । 

तत्काल संविधान जारी नगर्न गरेको आग्रह अस्वीकार गरेको भन्दै उनले नेपाली नेताहरूसँग वादविवाद गरेका थिए । 

यसपालि विदेशमन्त्रीका रूपमा आएका बेला पनि उनले चिनियाँ नेताको भ्रमणको विषयलाई आफ्नो ‘प्रतिष्ठा’ को विषय बनाएको परराष्ट्रका अधिकारीहरूले बताएका छन् ।

‘आफू आएकै दिन नेपालले उत्तरबाट पनि पाहुना बोलाएको भन्दै उहाँको असन्तुष्टि थियो, असन्तुष्टिभन्दा पनि उहाँले खुलेर रोष नै व्यक्त गर्नुभयो । 

कतिसम्म भने तय गरिएको बैठकमा भाग नलिनेसम्म पनि उहाँको भनाइ थियो,’ परराष्ट्रका एक अधिकारीले भने, ‘जयशंकरजीले प्रधानमन्त्री पुष्पकमल दाहाल र परराष्ट्रमन्त्री एनपी साउदसँग पनि आपत्ति नै जनाउनुभयो । 

नेपाली पक्षले दुई छिमेकबाट पाहुना आउनुको सन्दर्भ फरक–फरक भएको र एकै दिन पर्नु संयोग मात्र भएको स्पष्ट पारेपछि भारतीय विदेशमन्त्री आयोगको बैठकमा सहभागी हुन तयार हुनुभयो ।’ 

आयोगको बैठकपछि कांग्रेस सभापति शेरबहादुर देउवासँगको भेटमा समेत जयशंकरले यही विषय दोहोर्‍याएका थिए ।

परराष्ट्रमन्त्री एनपी साउद त्रिभुवन अन्तर्राष्ट्रिय विमानस्थल पुगेर भारतीय समकक्षीलाई स्वागत गरेका थिए । तर, चिनियाँ नेताको नेपाल भ्रमणबारे भने परराष्ट्र मन्त्रालय र नेपालस्थित चिनियाँ दूतावासले कुनै पनि सूचना बाहिर ल्याएको छैन । 

कूटनीतिक स्रोतका अनुसार, नेता सीले नेपालका प्रधानमन्त्री तथा माओवादी अध्यक्ष पुष्पकमल दाहालसहित उपराष्ट्रपति रामसहायप्रसाद यादव तथा एमाले, माओवादी र नेकपा एसका नेतासँग भेटवार्ता गर्ने कार्यक्रम छ ।
 

बैठक सकेपछि उनले कांग्रेस सभापति देउवा, एमाले अध्यक्ष केपी शर्मा ओली, नेकपा एसका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव, जनमत पार्टीका अध्यक्ष सीके राउत र लोकतान्त्रिक समाजवादी पार्टीका अध्यक्ष महन्थ ठाकुरलाई भेटे ।

भेटमा दुई मुलुकबीचको सम्बन्ध बलियो बनाउने तथा सहकार्य बढाउने विषयमा छलफल भएको भेटवार्तामा सहभागीहरूले जनाएका छन् । 

जयशंकर शुक्रबार बिहान पशुपतिनाथको दर्शन गर्दै छन् । त्यसपछि भारतको सहयोगमा त्रिभुवन विश्वविद्यालयमा निर्मित पुस्तकालयको उद्घाटन गरेर १२ बजे नयाँदिल्ली फर्कने कार्यक्रम छ ।