सोमवार, आश्विन ५ गते २०८३
सोमवार, आश्विन ५ गते २०८३
जीउँदो खसी बोका प्रतिकिलो ६५०, च्याङ्ग्रा एक हजार २२५ मा बिक्री
शुक्रवार , कार्तिक ३, २०८०
काठमाडौँ, कात्तिक । सरकारी स्वामित्वको खाद्य व्यवस्था तथा व्यापार कम्पनीले उपभोक्तालाई थप सहुलियत प्रदान गर्न खसीबोका तथा च्याङ्ग्राको मूल्य घटाएको छ ।
कम्पनीले जीउँदो खसी बोका तथा च्याङ्ग्राको मूल्यमा प्रतिकिलो रु १० छुट दिएको हो । कम्पनीले आजदेखि जीउँदो खसीबोका प्रतिकिलो रु ६५० तथा च्याङ्ग्रा प्रतिकिलो रु एक हजार २२५ मा बिक्री गर्न थालेको छ ।
खाद्यले यसअघि जीउँदो खसीबोका प्रतिकिलो रु १० छुट दिएर रु ६७० तथा च्याङ्ग्रा रु एक हजार २५० मा बिक्री गर्दै आएको थियो ।
पशुचौपायाको खरिद बिक्रीमा उपभोक्ताको उल्लेख्य सहभागिता नदेखिएको र लामो समयसम्म खसी बोका तथा च्याङ्ग्रा पाल्दा खर्च बढ्ने भएकाले मूल्य घटाएर बिक्री गर्न लागिएको कम्पनीले जनाएको छ ।
उपभोक्तालाई थप सहुलियत दिने उद्देश्यले जीउँदो खसी बोका तथा च्याङ्ग्राको मूल्य घटाइएको कम्पनीको सूचना अधिकारी शर्मिला न्यौपाने सुवेदीले बताए ।
खाद्यले गत असोज ३० गतेदेखि थापाथलीस्थित बागमती प्रादेशिक कार्यालयबाट खसीबोका तथा च्याङ्ग्रा बिक्री गर्दै आएको छ ।
खाद्यले मकवानपुर, दाङ र कैलालीबाट एक हजार छ सय ५८ खसी बोका तथा रसुवाबाट ५५४ च्याङ्ग्रा खरिद गरेर ल्याएको थियो । हालसम्म ६३० वटा मात्रै खसीबोका तथा च्याङ्ग्रा बिक्री भएको कम्पनीले जनाएको छ ।
अझै एक हजार ५८२ खसीबोका बिक्री हुन बाँकी छ । फुलपाती र अष्टमीमा खसी बोका तथा च्याङ्ग्राको बिक्री हुने गर्छ ।
“आज, फूलपाती र अष्टमीमा खसी बोकाको बिक्री हुने हो, लामो समयम्म राख्दा दानापानी तथा स्याहार सुसारमा खर्च गर्नुपर्ने अवस्था आउने भएकाले उपभोक्ता मूल्यमा थप छुट दिइएको हो”, सूचना अधिकारी न्यौपानेले बताए ।
काठमाडौँ उपत्यकामा उपभोक्तालाई सहुलियत मूल्यमा स्वस्थ खसीबोका तथा च्याङ्ग्रा उपलब्ध गराई मासुजन्य पदार्थको मूल्य स्थिरीकरण गर्ने उद्देशयले कम्पनीले खसी बोका बिक्री गर्दै आइरहेको छ ।
