बुधवार, कार्तिक १९ गते २०८३
बुधवार, कार्तिक १९ गते २०८३
७४ जिल्लामा सक्रिय संक्रमित, हुम्ला, कालीकोट र मुस्ताङमा शून्य संक्रमित, उपत्यकामा संक्रमण बढ्दै
सोमवार , श्रावण २३, २०७९
काठमाडौँ, साउन । पछिल्लो २४ घण्टामा नेपालमा थप ९३४ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार आइतबारको तुलनामा सोमबार संक्रमण संख्या बढेको हो । आइतबार ५५३ जनामा संक्रमण पुष्टि भएको थियो ।
पछिल्लो २४ घण्टामा २ हजार ८ सय ६२ पीसीआर र २ हजार ४ सय ८९ एन्टिजेन परीक्षण गरिएको थियो । पीसीआर परीक्षणबाट ४९८ र एन्टिजेन परीक्षणबाट ४३६ जनामा संक्रमण पुष्टि भएको हो ।
त्यस्तै पछिल्लो २४ घण्टामा कोरोनाबाट थप १ जनाको मृत्यु भएको छ । योसँगै नेपालमा कोरोनाबाट ज्यान गुमाउनेको संख्या ११ हजार ९७१ पुगेको छ । त्यस्तै अहिले नेपालमा सक्रिय संक्रमितको संख्या ५ हजार ६५९ पुगेको छ ।
उपत्यकामा संक्रमण बढ्दै
पछिल्लो समय काठमाडौं उपत्यकामा संक्रमण बढ्दै गइरहेको छ । पछिल्लो २४ घण्टामा काठमाडौं जिल्लामा मात्र २३६ जनामा संक्रमण पुष्टि भएको छ । योसँगै काठमाडौंमा सक्रिय संक्रमितको संख्या २ हजार ९९१ पुगेको छ ।
त्यस्तै भक्तपुरमा १७ र ललितपुरमा ४८ जना संक्रमित थपिएका छन् । भक्तपुरमा सक्रिय संक्रमितको संख्या ९७ र ललितपुरमा ७९२ पुगेको छ । सोमबारसम्म ५ सयभन्दा बढी सक्रिय संक्रमित हुने जिल्लामा काठमाडौं र ललितपुर रहेका छन् भने कास्की र मोरङमा २ सयभन्दा बढी संक्रमित रहेका छन् ।
त्यस्तै सक्रिय संक्रमित शून्य रहेका जिल्लामा भने मुस्ताङ, कालीकोट र हुम्ला रहेका छन् । मन्त्रालयको तथ्यांकअनुसार ७४ जिल्लामा सक्रिय संक्रमित रहेका छन् ।
उपत्यकाका विभिन्न अस्पतालमा ८१ जना कोरोना संक्रमितको उपचार भइरहेको छ । तीमध्ये १४ जना जनरल वार्डमा, ३९ जना एचडीयूमा, ३४ जना आईसीयूमा र १ जना भेन्टिलेटरमा छन्
नेपालमा पछिल्लो २४ घण्टामा ३२ हजार ५३४ मात्रा कोरोना खोप लगाइएको छ । अहिलेसम्म नेपालमा ४ करोड ९६ लाख ९ हजार ६९० मात्रा खोप लगाइएको छ ।
त्यसमध्ये २ करोड १६ लाख १० हजार ६७७ जनाले एक मात्रा, २ करोड ६ लाख ३६ हजार ८४४ जनाले पूर्ण मात्रा र ७३ लाख ६२ हजार १६९ जनाले अतिरिक्त मात्रा लगाएको स्वास्थ्य मन्त्रालयले जनाएको छ ।
