आइतवार, कार्तिक २३ गते २०८३
आइतवार, कार्तिक २३ गते २०८३
बिहिवार , पौष १०, २०७६
काठमाडौँ, पुस । बैठकको एजेण्डाकै बारेमा सहमती हुन नसकेर पटक पटक स्थगित भएको नेपाली काँग्रेस केन्द्रीय कार्यसमितिको बैठक आज पनि अनिर्णीत नै हुने देखिएको छ । सहमतीका लागि भन्दै बैठक स्थगित गर्दै पछाडी सारिएपनि अहिलेसम्म सहमती हुन नसकेकाले आजको बैठक पनि अनिर्णीत हुने देखिएको हो ।
महाधिवेशनको प्रक्रिया तत्काल थाल्ने विषयलाई बैठकको एजेण्डा बनाउने की नबनाउने र पार्टीको विभागहरु गठन गर्दा भागबण्डा कसरी गर्ने भन्ने विषयमा नेताहरुबीच विवाद रहेको छ । पटक पटक दुई पक्षीय तथा बहुपक्षीय रुपमा नेताहरुका बीचमा छलफल भएपनि अहिलेसम्म ठोस सहमतीमा पुग्न नसकेको नेताहरुले बताएका छन् ।
काँग्रेस सभापति शेरबहादुर देउवाले आगामी फागुनमा आफ्नो कार्यकाल सकिएपनि एक बर्ष म्याद थपेर महाधिवेशन गर्ने र त्यसका लागि अहिले नै हतार गर्नु नपर्ने अडान राख्नु भएको छ । तर देउवा इतरका नेताहरुले भने म्याद थप्ने भएपनि महाधिवेशनको कार्यतालिका अहिलेको बैठकबाटै पारित गरेर कार्यान्वयन गर्नुु पर्ने माग राखेका छन् ।
त्यसैगरी सभापति देउवाले निर्वाचित भएको तीन महिनामा गठन गरिसक्नु पर्ने विभागहरु अहिले गठन गर्ने तयारी गर्नुभएको छ भने अन्य नेताहरुले महाधिवेशनको मुखमा विभाग गठन औचित्यपूर्ण नभएको दावी गर्दै आएका छन् ।
असन्तुष्ट पक्षले विभाग गठन गर्ने नै हो भने गठन गर्न बाँकी अन्य निकायहरु पनि एकैचोटी गठन गर्नु पर्ने र त्यसमा भागबण्डा गर्नु पर्ने सर्त राखेका छन् ।
विवादित विषयमा अहिलेसम्म पनि सहमती हुन नसकेकाले एकातिर केन्द्रीय समितिको बैठक नै अन्यौलमा परेको छ भने नेताहरु गुठ बैठकमा सिमिति भएका छन् ।
