आइतवार, आश्विन ४ गते २०८३
आइतवार, आश्विन ४ गते २०८३
' संस्थापनइतर समूहका नेताको अभिव्यक्तिमा तर्क र विवेकको कमी महशुस भयो '
बिहिवार , श्रावण ७, २०८३
काठमाडौं, साउन ।
नेपाली कांग्रेस संसदीय दलका नेता भीष्मराज आङदेम्बेले संस्थापनइतर समूहका नेताहरूको अभिव्यक्तिमा तर्क र विवेकको कमी महशुस भएको टिप्पणी गरेका छन्।
बिहीबार कांग्रेस केन्द्रीय नीति,अनुसन्धान तथा प्रशिक्षण प्रतिष्ठानले काठमाडौंमा आयोजना गरेको नवीन परिस्थिति, नवीन संकल्प, नवीन अभियान कार्यक्रममा नेता आङदेम्बेले विभिन्न डबलीहरूमा सुनिएका विचारहरूमा तर्क र विवेकको कमी महशुस भएको भन्दै विवेक र तर्क हराएर अहङ्कार र गालिमा रूपान्तरित भएको उल्लेख गरे।
उनले राजनीतिलाई व्यापार वा लाभ–हानिको हिसाबबाट मुक्त गरी निस्वार्थ सेवामा रूपान्तरित गर्नु आजको पुस्ता र नेतृत्वको मुख्य कर्तव्य भएको धारणा राखे ।
राजनीतिको वास्तविक धरातल गरिब, निमुखा, श्रमजीवी, किसान र इमानदार कार्यकर्ता भएको उनको भनाइ छ ।
उनले कांग्रेसको नेतृत्वले नै देशको काचुली फेर्ने र मुलुकलाई समृद्ध बनाउने उल्लेख गर्दै कार्यकर्ता र जनताको विश्वासलाई सदैव जीवन्त राख्ने प्रण गरे।
त्यस्तै नेता आङदेम्बेले पार्टी र देशलाई अघि बढाउन ऐतिहासिक निर्णय गर्ने समय आएको धारणा राखे।
