काठमाडौँ, साउन ।
नयाँ आर्थिक वर्ष २०८३–८४ को सुरुवातसँगै सुदूरपश्चिम प्रदेश बजेट शून्यताबाट गुज्रिएको छ । प्रदेश सरकारले प्रदेश सभामा प्रस्तुत गरेको बजेट पारित हुन नसकेपछि यो प्रदेशमा आजदेखि बजेट शून्यता सुरु भएको हो ।
नेपाल कम्युनिष्ट पार्टी (एमाले) ले सरकारको साथ छाडेपछि अल्पमतमा परेको मुख्यमन्त्री कमलबहादुर शाह नेतृत्वको सरकारले अध्यादेशमार्फत पेश्की बजेट पनि ल्याउन सकेन ।
प्रदेश सरकारको आर्थिक मामिलामन्त्री विक्रमसिंह धामीले असार १ गते मध्यरातमा आर्थिक वर्ष २०८३–८४ का ३७ अर्ब ७० करोड रुपियाँको बजेट प्रस्तुत गरेका थिए ।
सरकारले प्रस्तुत गरेको बजेट पारित नभएकाले बजेट खर्च अवरुद्ध भएको प्रदेश लेखा नियन्त्रक कार्यालयका प्रमुख वासुदेव जोशीले बताए ।
उनले राजस्व सङ्कलनमा समस्या नभएको उल्लेख गरे । “राजस्व सङ्कलन गतवर्ष बनेको पुरानै कानुनअनुसार हुन्छ । अवरुद्ध हुँदैन”, जोशीले भने ।
यसअघि, आर्थिक वर्ष २०८१–८२ को बजेट पनि पारित हुन नसक्दा साउन र भदौ दुई महिनासम्म बजेट शून्यताको अवस्था सृजना भएको थियो । भदौ अन्तिममा दोस्रो बजेट ल्याएर सभाबाट पास गरिएपछि बजेट शून्यता टरेको थियो ।
