प्रधानमन्त्री देउवाले मोदीसँगको भेट गम्भीर र सुमधुर भएको संक्षिप्त प्रतिक्रिया दिए । ‘मैले उहाँलाई नेपाल भ्रमणको निम्तो दिएँ, उहाँले पनि भारत भ्रमणको निम्तो दिनुभयो,’ उनले भने, ‘द्विपक्षीय भ्रमणबारे काठमाडौं पुगेपछि मितिको टुंगो गरिनेछ ।’

नेपाल र भारतबीच पछिल्लो समय सीमा, दार्चुलाको तुइन घटनालगायतका विषय उठेका छन् तर मंगलबारको भेटवार्तामा ती विषयमा कुराकानी भए/नभएको भन्नेबारेमा दुवै पक्षले खुलाएको छैन ।

परराष्ट्र मन्त्रालयका सचिव भरतराज पौड्यालले ग्लास्गोस्थित कोप २६ आयोजना स्थल ‘स्कटिस एक्जिबिसन सेन्टर’ मा प्रधानमन्त्री देउवा र मोदीबीच द्विपक्षीय भेटवार्ता भएको जानकारी दिए ।

‘उहाँहरूबीच द्विपक्षीय सम्बन्ध अघि बढाउने र सहयोग आदानप्रदानबारे छलफल भयो,’ उनले भने । भेटवार्ता करिब २० मिनेट भएको थियो । भेटवार्तामा नेपालका तर्फबाट वन तथा वातावरणमन्त्री रामसहायप्रसाद यादव, परराष्ट्र सचिव पौड्याल र अन्य पदाधिकारीको सहभागिता रहेको थियो । मोदीसँग भने विदेशमन्त्री एस जयशंकर र राष्ट्रिय सुरक्षा सल्लाहकार अजित डोबलसहितका पदाधिकारी थिए ।

भेटवार्तामा व्यस्त देउवा

कोप–२६ को उच्चस्तरीय सत्रलाई सोमबार दिउँसो सम्बोधन गरेपछि देउवा औपचारिक–अनौपचारिक भेटमा व्यस्त छन् । उनी सोमबार साँझ कोप–२६ आयोजक मुलुक बेलायतका प्रधानमन्त्री बोरिस जोन्सनले आयोजना गरेको रात्रिभोजमा सहभागी भएका थिए । रात्रिभोजमा जोन्सनसहित अमेरिकी राष्ट्रपति जो बाइडेन, जर्मन चान्सलर एन्जेला मार्केललगायतका नेताहरूसँग देउवाले अनौपचारिक वार्ता गरेका थिए ।

^{एमसीसीकी डेपुटी सीईओ एलेक्सिया लाटोर्टे प्रधानमन्त्री शेरबहादुर देउवासँग भेटवार्ता गर्दै ।}

प्रधानमन्त्री देउवाले सोमबार नै राष्ट्रसंघीय महासचिव एन्टोनियो गुटेरेससँग र भारतीय समकक्षी नरेन्द्र मोदीसँग पनि अनौपचारिक भेट गरेका थिए । त्यसक्रममा उनीहरूले कोप–२६ मा पर्वतीय र हिमालय क्षेत्रको मुद्दा र दिगो विकासलाई जोडदार रूपमा अघि बढाउनुपर्नेमा जोड दिएका थिए ।

 ^{श्रील‌ंकाली राष्ट्रपति गोटाभाया राजापाक्षसँग भेटवार्ता गर्दै प्रधानमन्त्री शेरबहादुर देउवा ।}

प्रधानमन्त्री देउवाले आफ्नो सम्बोधनमा पनि हिमालय क्षेत्रको बचाउ र तल्लो तटीय क्षेत्रको सुरक्षाका लागि विश्वको तापक्रम १.५ डिग्री सेल्सियसमा सीमित गर्नुपर्ने र त्यसका लागि विकसित मुलुकहरूले महत्त्वाकांक्षी योजना सार्वजनिक गर्नुपर्ने बताएका थिए ।

^{प्रधानमन्त्री शेरबहादुर देउवासँग भेटवार्ता गर्दै बेलायती रक्षामन्त्री बेन वालेस ।}

देउवाले मंगोलियाका राष्ट्रपति उखना खुरेलसुख र श्रीलंकाका राष्ट्रपति गोटाबाया राजापाक्षसँग पनि भेटवार्ता गरे । उनले मंगलबारै वन तथा भू–उपयोग व्यवस्थासम्बन्धी उच्चस्तरीय कार्यक्रमलाई सम्बोधन गरे । त्यसक्रममा उनले नेपालले स्वैच्छिक कार्बन बजार र उत्सर्जन घटाउने र द्रुत गति वन (एलईएएफ) उपकरणमा नेपालको चासो रहेको बताए ।

कान्तिपुर दैनिकको सहयोगमा