आइतवार, कार्तिक २३ गते २०८३
आइतवार, कार्तिक २३ गते २०८३
बिहिवार , भाद्र ४, २०७७
काठमाडौँ, भदाै । नेपाली कांग्रेसले निषेधाज्ञाका समयमा भ्रष्टाचार, सत्ताद्वन्द्व तथा प्रधानमन्त्रीका हलुका टिप्पणी पनि निषेध रहुन् भनेको छ ।
प्रवक्ता विश्वप्रकाश शर्माले एक विज्ञप्ति प्रकाशित गर्दै जनताले अप्ठेरो सहेर र कांग्रेसले 'सरकारमा सँगै नरहेर पनि संकटमा सँगै लड्न सकिन्छ' भन्ने मान्यतामा रहेर सरकारलाई साथ दिइरहेको बताइएको छ ।
विज्ञप्तिमा कोरोना विरुद्धको संघर्षमा संयम र एकताका लागि सरकार र समुदायलाई अपिल गरिएको छ । यसअघिको एक सय बीस दिन लामो लकडाउनले लकडाउन या निषेधाज्ञा आफैंमा समाधान नभएको पुष्टि भएको भन्दै विज्ञप्तिमा सरकारले अधिकतम क्षमता प्रस्तुत गर्न सक्नुपर्ने बताइएको छ ।
'नेपाली कांग्रेस आग्रह गर्दछ- विगतमा गरिएका कमजोरी र गल्तीबाट पाठ सिकेर युद्धस्तरमा कार्य गर्ने स्थितिको विकास हाल जारी निषेधाज्ञाको समयमा गरियोस्,' विज्ञप्तिमा भनिएको छ ।
'चैत महिनादेखि सवा सय दिनसम्मको लकडाउनमा देशले कोरोनाविरुद्धको संघर्ष भन्दा सत्ताको द्वन्द्व, भ्रष्टाचार र प्रधानमन्त्रीका हलुका एवं विवादास्पद अभिव्यक्तिह बढी सुन्यो, देख्यो र भोग्यो ।
निषेधाज्ञाको अबको चरणमा यी बिषयलाई निषेध गरेर अघि बढ्ने इच्छाशक्ति र सामर्थ्य देशले खोजेको छ,' प्रवक्ता शर्माले भनेका छन् ।
यस्तै, फ्रन्टलाइनमा कार्य गरिरहेका स्वास्थकर्मी, सफाइकर्मी, सुरक्षाकर्मी र संचारकर्मीप्रति सम्मान व्यक्त गर्दै कांग्रेसले उनीहरुलाई आवश्यक पर्ने भौतिक सामग्री र मनोवैज्ञानिक सहजताका लागि सहजीकरण गर्न पनि सरकारलाई अपील गरेको छ ।
निषेधाज्ञा लम्बिन सक्ने स्थितिमा श्रमिक, विद्यार्थी, बेरोजगार युवा, एकल महिला, अपांगता भएका नागरिक आदिलाई हातमुख जोर्न संकट पर्न सक्ने अवस्था आउने भन्दै विज्ञप्तिमा भनिएको छ, 'अतः त्यसबारेमा समयमै दृष्टि र योजना निर्माण गरिराख्नु जिम्मेवार राज्यको कर्तव्य हुन्छ । नेपाली कांग्रेस ती सबै वर्ग र समुदायका तर्फबाट सरकारलाई यसबारे आवश्यक ध्यानाकर्षण गराउन चाहन्छ ।'
