शनिवार, कार्तिक २२ गते २०८३
शनिवार, कार्तिक २२ गते २०८३
कांग्रेसको भागमा ८ मन्त्रालय : अब चारजना मन्त्री थपिने
शुक्रवार , आश्विन २२, २०७८
काठमाडौँ, असोज । सत्ता गठबन्धन बैठकले मन्त्रालय भागबन्डाको विषय टुंग्याएसँगै अब कांग्रेसभित्र पनि मन्त्री बन्नेको नाम छनोट गर्न कांग्रेस शीर्ष नेताबीच छलफल चलेको छ । कांग्रेसबाट अब चारजना मन्त्री थपिने भएपछि मन्त्री बन्न दौडधूप सुरु भएको छ । सरकारलाई पूर्णता दिन सहमति जुटेपछि देउवाले आज मन्त्रिपरिषद् विस्तार गर्ने तयारी गर्दै छन ।
कांग्रेसको भागमा ८ मन्त्रालय राखेका छन् । त्यसमध्ये कानुन, न्याय तथा संसदीय मामिला र रक्षा पौडेल पक्षलाई दिने तयारी देउवाको छ । कृष्णप्रसाद सिटौला पक्षलाई पनि एउटा मन्त्रालय दिले तयारी छ । सिटौला पक्षबाट उमाकान्त चौधरी मन्त्री बन्ने करिब निश्चित छ ।
अहिले गृहमन्त्री बालकृष्ण खाँण, परराष्ट्रमन्त्री नारायण खड्का, कानुन न्याय तथा संसदीय मामिलामन्त्री ज्ञानेन्द्रबहादुर कार्की गरी ३ मन्त्रालय कांग्रेससँगै छन् । तर, कार्कीलाई सञ्चार मन्त्रालयको जिम्मेवारी दिएपछि कानुनसहित बाँकी रहेका ४ मन्त्रालयमा देउवाले नयाँ मन्त्री थप्नेछन् ।
मन्त्री वरिष्ठ नेता पौडेललाई १, महामन्त्री शशांक कोइरालालाई १ र नेता कृष्णप्रसाद सिटौलालाई १ मन्त्री दिने तयारी देउवाको छ । कसलाई बनाउने भनेर छलफल भइरहेको छ ।
कांग्रेसमा अहिले मन्त्री बन्नेको सूचीमा पुष्पा भुसाल, उमा रेग्मी, मिनेन्द्र रिजाल, दिलेन्द्रप्रसाद बडु, तेजुलाल चौधरी, राजन केसी, भीमसेनदास प्रधान र उमाकान्त चौधरीमध्येबाट मन्त्री थपिने सम्भावना छ ।
बुधबार बालुवाटारमा देउवाले पौडेल, कोइराला र पूर्वमहामन्त्री प्रकाशमान सिंहसँग मन्त्रीको नामबारे छलफल गरेका थिए । देउवाले २ जनामात्रै मन्त्री बनाउन सक्ने भनेपछि वरिष्ठ नेता पौडेलले तेजुलाल चौधरी र दिलेन्द्रप्रसाद बडुको नाम लिएका थिए ।
महामन्त्री कोइरालाले भने मिनेन्द्र रिजालको नाम लिएपछि उनी मन्त्रीमा जाने पक्का जस्तै भएको छ ।
देउवाले आफ्नो तर्फबाट थप गर्ने एक जना भने पुष्पा भुसालको प्रबल सम्भावना छ ।
‘मन्त्री छान्ने प्रधानमन्त्रीले हो, आकांक्षी धेरै छन, अहिले यस्तै हुन्छ भन्न सकिन्नँ । तर, पार्टीभित्रको समीकरण मिलाएर नै गर्नुपर्ने दबाब छ,’ एक नेताले भने ।
