बिहिवार, कार्तिक २० गते २०८३
बिहिवार, कार्तिक २० गते २०८३
मंगलवार , श्रावण ५, २०७८
काठमाडौं, साउन । पछिल्लो २४ घण्टामा नेपालमा २ हजार २०२ मा कोरोना भाइरस संक्रमण देखिएको छ । स्वास्थ्य मन्त्रालयका अनुसार ८ हजार ८३६ पीसीआर परीक्षणमा मंगलबार थप २ हजार २०२ मा संक्रमण पुष्टि भएको हो ।
यो सँगै नेपालमा कोरोना भाइरसबाट संक्रमित हुनेको संख्या ६ लाख ७० हजार ९५३ पुगेको छ । यस्तै एन्टिजेन विधिद्वारा गरिएको ४ हजार २९९ परीक्षणबाट ९०६ मा पोजिटिभ देखिएको छ ।
२४ घण्टामा पीसीआर र एन्टिजेन विधिबाट गरिएको १३ हजार १३५ परीक्षणमा ३ हजार १०८ मा संक्रमण पुष्टि भएको मन्त्रालयले जनाएको छ । पछिल्लो २४ घण्टामा थप १ हजार ५९५ संक्रमणमुक्त भएका छन् ।
हालसम्म निको हुनेको संख्या ६ लाख ३४ हजार ९२७ रहेको छ । नेपालमा कोरोना संक्रमणबाट थप २५ को मृत्यु भएको छ । हालसम्म कोरोनाबाट मृत्यु हुनेको संख्या ९ हजार ६०७ पुगेको छ ।
हालसम्म देशभर ३४ लाख ८६ हजार ३५४ नमुनाको पीसीआर परीक्षण भएको छ । क्वारेन्टाइनमा ३२६ रहेका छन् भने आइसोलेसनमा रहनेको संख्या २६ हजार ४१९ रहेको छ ।
यसैबीच काठमाडौं उपत्यकामा पछिल्लो २४ घण्टामा ७१९ संक्रमित थपिएका छन् । मन्त्रालयका अनुसार काठमाडौं ५३१, ललितपुर १४७ र भक्तपुरमा ४१ मा संक्रमण देखिएका हुन् ।
यस्तै देशभर आईसीयूमा ५९२ र भेन्टिलेटरमा १७२ संक्रमितको उपचार भइरहेको मन्त्रालयको तथ्यांक छ ।
