• आज : Monday 28 May 2018
    1:50:06 NST

प्रधानमन्त्री ओलीले भने : 'पाँच वर्षभित्र भारतीय लगानीमा काठमाडौँ–रक्सौल रेलमार्ग बन्छ'

काठमाडौं, ३० बैशाख ।  भारतीय प्रधानमन्त्री नरेन्द्र मोदीको मैत्रीपूर्ण राजकीय भ्रमण दुई देशबीचको सम्बन्धलाई नयाँ उचाइमा उठाउन उपलब्धिमूलक भएको प्रधानमन्त्री केपी शर्मा ओलीले बताए । 
राष्ट्रियसभाको आजको बैठकमा भारतीय प्रधानमन्त्रीको भ्रमणबारे जानकारी दिँदै प्रधानमन्त्री ओलीले दुई देशबीचको सम्बन्धलाई पारस्परिक लाभ र समानताका आधारमा अघि बढाउने सन्दर्भमा भ्रमण सार्थक भएको उल्लेख गरे । 
प्रधानमन्त्री ओलीले भारतीय प्रधानमन्त्री मोदी आफ्नो भ्रमण सकेर फर्कने क्रममा आफूले टेलिफोनमा कुराकानी गर्ने क्रममा प्रशंसापूर्वक ढंगले भ्रमण सफल भएको र दुई देशबीचको सम्बन्धलाई समुचित आधारमा अगाडि बढाउने उल्लेख गरे । 
“भ्रमणले उपयुक्त प्रतिफल दिनेमा म विश्वस्त छु, हामी एउटा नयाँ युगमा प्रवेश गरेका छौँ अब, द्विपक्षीय, बहुपक्षीय र सर्वपक्षीय सम्बन्धलाई ध्यानमा राखेर अन्तर्राष्ट्रिय नीति र उत्तरदायित्वलाई समेत आत्मसात् गरी स्थायित्व, विकास र समृद्धिको दिशामा सबै एक भएर अघि बढ्नुपर्छ”, उहाँले भन्नुभयो । भ्रमणले विगतमा देखिएका असझदारी र नमिल्दा कुरालाई सच्याएर उपयुक्त  हिसाबले जान सहमत गराएको उल्लेख गर्दै उनले भ्रमणका क्रममा देखापरेको राष्ट्रवाद तथा जनताको सजगतापूर्ण सद्भावको सराहना पनि गरे । 
 
प्रधानमन्त्री ओलीले नेपालको सार्वभौमसत्ता र स्वाधीनतामा कुनै असर नपुर्‍याई आफ्नो मामिलामा आफैं निर्णय गर्न कुनै अवरोध नपर्ने गरी दुवैपक्ष सहमत हुनु सकारात्मक उपलब्धि रहेको बताए । 
कृषि क्षेत्रको विकास र सहकार्यमा आवश्यकताका आधारमा गरिनुपर्ने कामलाई दुवै देशले प्राथमिकता दिई कुन क्षेत्रमा के कस्ता विषयलाई समेट्न सकिन्छ भनेर विज्ञ समूह गठन गरी कार्यसूची बनाएर चाँडै कृषिमन्त्रीस्तरीय वार्ता गरिने उल्लेख गरे । 
मुलुकको समृद्धिसँग जोडिएको काठमाडौँ–रक्सौल रेलमार्ग आगामी पाँच वर्षभित्र भारतीय लगानीमा बन्ने र प्रधानमन्त्री ओलीले  थपे, काठमाडौँ–रक्सौल रेलमार्ग सञ्चालनका लागि संयुक्त कार्यदल बनाएर छिट्टै अध्ययन शुरु गरिने उल्लेख गरे । 
दुई देशबीचको असाधारण व्यापार घाटा कम गर्न आगामी तीन महिनाभित्र व्यापार सन्धि पुनरवलोकन गरी भारतीय बजारमा नेपाली उत्पादन निर्यात बढाउन, चिया, अदुवा, जुट, अलैँचीलगायत वस्तुको निर्यात बढाउने सहमति भएको प्रधानमन्त्रीको भनाइ थियो । उनले नेपाल प्रवेश गर्ने हवाई मार्ग बढाउन, तराईमा डुबान समस्या समाधान 
गर्न भ्रमणका क्रममा कुरा उठाएको र त्यसमा भारत सरकार सकारात्मक रहेकाले संयुक्त कार्यदल बनाई काम अघि बढाइने बताए । 
ऊर्जा व्यापारमा रहेको असमझदारी हटाई द्विपक्षीय व्यापार प्रवद्र्धनमा समान नीति बनाउने सहमति भएको छ भन्दै प्रधानमन्त्री ओलीले पञ्चेश्वर परियोजनाको विस्तृत परियोजना प्रतिवेदन सम्पन्न गरी निर्माण प्रक्रिया अघि बढाइने जनाए । 
नेपालले थप बन्दरगाहको प्रयोग गर्ने विषयमा समेत छलफल भएको बताउँदै प्रधानमन्त्री ओलीले सडक सञ्जालको विस्तार र विकासमा महत्वपूर्ण विचारविमर्श भएको उल्लेख गरे । 
प्रधानमन्त्री ओलीले भारतीय प्रधानमन्त्रीले भ्रमणका क्रममा व्यक्त गरेका आवश्यकता र प्राथमिकताका आधारमा अघि बढ्नुपर्ने अभिव्यक्ति सराहनीय रहेको बताउँदै दुई देशबीचको सम्बन्ध नयाँ उचाइका साथ समान हैसियतमा अघि बढाउन महत्वपूर्ण भूमिका खेल्ने बताए । 
प्रधानमन्त्री ओलीले हालै देशका विभिन्न स्थानमा असिनापानीबाट भएको बालीनालीको क्षतिप्रति दुःख व्यक्त गर्दै उद्धार तथा राहतका लागि निर्देशन दिइसकिएको बताए ।

Comment

Related News